Студентите – членови на Студентскиот Пленум за денеска во 12 часот најавија блокада на сите влезови на комплексот факултети на УКИМ, за да се спречи, како што велат, нелегален и криминален избор на нов студентски „лидер”.
Пленумци велат дека во услови кога на последната седница на Сенатот договорено е да се формира Комисија која до 15. септември треба да изготви предлог измени во Статутот за студентското дејствување, нелогично е сега да се спроведуваат избори.
-Студентите сега ќе имаат шанса да го изменат Статутот да го демократизираат студентското организирање и да го отворат процесот за сите студенти на УКИМ. Затоа ги повикуваме сите студентите утре 12 часот на платото на УКИМ да се приклучат на блокадата на студентските избори. Потсетуваме дека тоа не е кривично дело бидејќи ние сите сме членови на Студентскиот Парламент и сме обесправени во делот да можеме да кандидираме кандидат, да имаме пристап до правните акти, пристап до Собранието и состаноците каде се носат одлуките и затоа студентите имаат апсолутно право да спречат избори кои се крајно нелегални, изјави Ивана Туфегџиќ – членка на Студентскиот Пленум.
Изборите за нов студентски претседател се закажани за денеска во просториите на УКИМ. Поднесени кандидатури имаат студентите Давор Поповски од Факултет за информатички науки и компјутерско инженерство (ФИНКИ) и Стефан Василевски од Медицинскиот факултет.
Пленумци апелираат изборите да се одложат пред да се случат какви било блокади.
„Овие избори се распишани од студенти кои веќе две години им е истечен мандатот и со тоа го изгубија правото да распишуваат избори. Овие избори се спроведени во лето надвор од академската година, кога најголем број од студентите не се во Скопје и не можат да гласаат. На овие избори нема избор! Двајцата кандидати кои претендираат да станат студентски претставници својата кандидатура ја темелат на поддршката на 13 парламенти на матичните факултети кои немаат право да ја дадат истата бидејќи им е истечен мандатот“, стои во повикот за бојкот на Студентскиот пленум.
Пленумци досега во повеќе наврати аплармираа за незаконитоста околу целата постапка за спроведување на студентските избори.Пред две недели тие упаднаа во просториите на Студентскиот Парламент со цел да добијат информации според кој Правилник се организирани изборите, зошто без избор и јавно истакнат оглас на сите матични факултети и во сезона кога студентите се надвор од Скопје и немаат можност да гласаат.
Тие посочија дека рокот бил скратен за 10 дена, што според нив во таков кус рок невозможно е да се соберат 3 илјади студентски потписи за поднесувањ на кандидатура.
Актуелниот претседател на Студентскиот Парламент, чиј мандат е истечен пред две години, вели дека треба д аим се даде шанса на студентите да спроведат избори.
-Матичните факултети се посебни правни тела, јас не сум надлежен, можам само да кажам дека изборите се организирани согласно Статутот, сите имаа шанса да поднесат кандидатури и да се информираат соодветно со писмени барања, тоа е мојот коментар.
Писмено да се обратат за целата постапка беше одговорот на Спироски и во текот на расправијата со Пленумц, кога дел од членовите на Парламентот, ги обвинија студентите кои бараат одговори дека се платеници на СОРОС.