Koнтроверзниот индиски бизнисмен Субрата Рој, кој во својата земја се гони за криминали денеска ја завршува неколкудневната посета на Охрид, каде најави инвестиции од една милијарда евра во различни области- сточарството, туризмот, па дури и филмската индустрија.
Што се однесува до инвестицијата во агрокомбинатот „Џумајлија“, Субрата Рој најави дека за три години планира да вложи 200 милиони евра, а и информираше дека е доставена банкарската гаранција со која 100 процентно ја потврдува инвестицијата.
Планот е да изгради современа млекарница од која ќе се извезуваат млеко и млечни производи покрај во Балканските земји и во Средниот исток, Северна Африка, а според договорот, во првите 18 месеци по стапување во сила на договорот компанијата е должна да отвори 900 работни места, да набави 8.000 крави и да вложи 60 милиони евра.
За три години треба да отвори 2.000 работни места и да набави 20.000 крави, а закупецот е должен да има производство на млеко со капацитет од 80.000 литри дневно и производство на 75.000 тони сточна храна до крајот на третата година, на површината од 5.353 хектари на Агрокомбинатот Џумајлија.
Субрата Рој синоќа приреди свечен прием на терасата на хотелот „Славија Спектар“ – кој сега е дел од „Сахара“ групацијата, на кој присуствуваа премиерот Никола Груевски, министри, политичари, претставници на дипломатскиот кор и познати јавни личности.