Извадени се од контекст деталите од Извештајот од обдукцискиот наод на Тамара Димовска, тврдат за НОВА од Институтот за Судска медицина.
Експертите велат дека тие ја навеле бронхопнеумонијата која е непосредна причина за смрт, но, кој е условот и поводот што довел до оваа болест и до смрт, ќе биде предмет на понатамошната истрага.
Во обемниот Извештај е наведено се што треба, а кога ќе биде потребно се што е напишано ќе го образложиме пред обвинителот или во Судот, велат во Судска медицина. .
„Ние ја дадовме непосредната причина за смрт, а тоа е бронхопнеумонија. Но, условот и поводот кои довеле до смрт ќе бидат предмет на понатамошна постапка“, изјави за НОВА професорката Биљана Јаневска која го предводеше тимот што ја изврши обдукцијата.
Јаневска објаснува дека сколиозата како основна болест довела до намалување на градниот кош и намалување на капацитетот на белите дробови, што предизвикало понатамошни компликации. Токму тоа ќе стои и во Лекарскиот извештај кој е всушност официјален документ за причина на смртта, а треба да го подготви и на семејството да му го предаде Институтот за Судска медицина.
„Во тој извештај прво стои непосредната болест која довела до смрт, а тоа е брохопнеумонијата во случајот. Второ е состојбата на болест, а последна е основната болест, односно сколиозата,“вели Јаневска.
Од Судска медицина потенцираат дека ги обезбедиле сите материјални докази, фотографии од текот на три часовната обдукција , како и микробиолошки и хистопатолошки анализи кои се приложени во обемниот Судско медицински извештај.
„Ние сме должни да го обезбедиме и чуваме тој материјал во случај да биде побарано второ мислење. Семејството го има тоа законско право, доколку овластена институција побара ние ќе им го доставиме овој материјал за да може да се обезбеди и второ мислење. Судот или обвинителот одлучува каде ќе биде направено второто вештачење“ , тврдат од Судска медицина.
По завршувањето на целата процедура, наодот од обдукцијата на Судска медицина беше предаден во Државниот санитарен и здравствен инспекторат, која потоа треба да го достави до обвинителот.Но, од ДСЗИ вчера испратија соопштение во кое се вели дека во извештајот од обдукцијата е утврдено дека причината за смртта не е сколиоза, туку бронхопневмонија, односно акутно воспаление на респираторните органи, а утврдено е и присуство на емфизем во белите дробови.
.
„Државниот санитарен и здравствен инспекторат ќе испита дали Тамара воопшто била лекувана од оваа сериозна дијагноза. Првичните проверки и извршениот увид во електронскиот здравствен систем покажуваат дека девојчето не било третирано, односно воопшто не посетило лекар, ниту примало одредени лекарства за бронхопневмонијата. Државниот санитарен и здравствен инспекторат ќе продолжи со испитување на случајот во рамки на своите овластувања и надлежности“, се вели во соопштението на ДСЗИ.
Во Институтот за Судска медицина велат дека не навлегуваат во ваквиот начин на презентирање на информациите од страна на Државниот санитарен и здравствен инспекторат.
Од таму потенцираат дека не се подготвени да влегуваат во било каква комуникација со јавноста додека постапката не ја превземе Јавниот обвинител. Се што имале кажале во Судско медицинскиот извештај, кој потоа ќе биде образложен во надлежните институции, обвинителство или во Судот.