Судијата Владимир Туфегџиќ до крајот на месецот ќе суди во Кривичниот суд. Потоа ќе стане дел од угледна адвокатска канцеларија.
Судскиот совет на денешната седница ја констатираше оставката на судијата Владимир Туфегџиќ. Тој беше судија во Основниот кривичен суд Скопје.
Судијата Туфегџиќ пред две недели на својот „Фејсбук“ профил објави дека поднел барање за престанок на вршење на судсиката функција.
– Судиската функција ја доживувам како престижна статусна функција која претставува предизвик, да се реализира судија од кариера преку постојано едуцирање и напредок во кариерата. Доколку не се оствари напредувањето во кариерата, како основна цел, мотив и двигател во секоја работа, особено на судиската функција, поради нарушен систем на вредности, тогаш започнува да се губи смислата и мотивот да се продолжи понатаму во истиот амбиент, напиша неодамна на својот „Фејсбук“ профил судијата Владимир Туфегџиќ.
Тој најави дека кариерата ќе ја продолжи во угледна адвокатска канцеларија.
Денеска Судскиот совет констатираше и уште еден престанок на судсиската функција. Станува збор за судијката Маринела Јакасановска од Основниот граѓански суд – Скопје, која заминува во пензија. Највисокото судско тело, денеска донесе одлуки за престанок на мандатот на судии поротници во основните судови во Берово и Струга, а избра петмина нови судии – поротници во беровскиот суд.
Инаку, на денешната седница Судскиот совет донесе Методологија со индикатори за утврдување на сложеноста на судските предмети.