Директорот на Царинската Управа Горан Сугарески најави дека со пари од Светска Банка ќе започне реконструкција на граничниот премин кон Бугарија, Деве Баир. Со тоа како што посочи ќе се зголеми протокот на патници и стоки, што пак директно влијае врз зголемување на економскиот раст.
Активностите се дел од проектот на Светска Банка насочен кон олеснување на трговијата и транспортот во Западен Балкан, во чии рамки за реконструкција на граничните премини Ќафасан и Деве Баир се одобрени се 4.1 милион долари, вели директорот на Царина.
-Со зголемување на меѓународното значење на граничниот премин Деве Баир и зголемената фреквенција на промет на патници и стоки, се наметнува потреба од проширување на преминот со по две дополнителни сообраќајни ленти за влез и излез од државата. Модернизацијата и стандардизацијата на граничните премини се дел од активностите кои ги преземаме во насока на намалување на корупцијата, што е наш приоритет и точка високо ставена на приоритетната листа на Владата, истакна Сугарески.
Додаде и дека со овој проект планирана е реконструкција на управната зграда на патниот премин и на пристапниот пат до терминалот за тешки возила заради негово непречено користење во зимски услови, како и изградба на нова пречистителна станица и поставување на нова колска вага.
Царинската управа има директна улога во зголемувањето на економскиот раст на земјата и создавање на поповолна деловна клима, изјави Сугарески.