Полицијата приведе вкупно 12 лица, од кои седум странски државјани и петмина македонски, поради нелегално препродавање билети за натпреварот од Суперкупот.
Од приведените, двајца се Англичани, двајца Украинци, еден Русин , еден Србин и двајца Македонци.
Станува збор за двајца англиски државјани кои им препродале карти на двајца украински државјани. При извршен преглед кај украинските државјани пронајдени се вкупно пет билети без наведени лични податоци, додека кај еден од англиските државјани пронајдени се 6 коверти со по еден билет на различни имиња. При извршениот разговор, еден од украинските државјани изјавил дека еден или два билети купил од Англичаните.
За настанот известен е Јавен обвинител и по брза постапка ќе биде поднесена соодветна пријава за сторено кривично дело „недозволена трговија“ по чл.277 од Кривичниот законик.
Поради препродажба не брендирани реквизити, полицијата приведе еден бугарски и еден македонски државјанин, а според информациите Македонецот е вработен во Агенција за разузнавање.
Министерството за здравство, повикувајќи се на информациите од дежурните екипи, во текот на вчерашната вечер околу одржувањето на Супер купот на УЕФА, соопшти дека не е регистрирано зголемување на вообичаениот број интервенции.
На Клиниката за токсикологија не е примен ниту еден пациент, во службата за Итна медицинска помош не се регистрирани колапси, а само еден странски државјанин со скршеница на рака е транспортиран во Клиниката по хируршки болести „Св.Наум Охридски“.
Исто така, и од Ургентниот центар во комплексот клиники информираат дека ноќта поминала мирно и без зголемен број интервенции.