Свечено е отворен реновираниот парк Гези, каде минатиот месец започнаа антивладините демонстрации кои за кратко време ескалираа во големи немири и се проширија низ повеќе градови на Турција.
Истанбулскиот валија Хусеин Авни Мутлу на отворањето на проширениот парк ги покани сите жители на градот од 7 до 70 годишна возраст да дојдат и да го посетат реновираниот парк.
„Не сакаме немири, сакаме братство и мир”, истакна Мутлу подвлекувајќи дека претстојниот рамазански месец е месец на надминување на сите несогласувања и навреди. Мутлу предупреди дека паркот не припаѓа само на еден дел туку на сите жители на градот.
Во однос на евентуалните демонстрации и протести тој подвлече дека, тие права граѓаните ќе можат како и порано да си ги користат со претходно добиена дозвола од валијството, истакнувајќи дека во спротивно нема да се дозволи присвојување на паркот од страна на одредени групи.
Демонстрациите на паркот Гези започнаа од група активисти кои го искажаа својот револт поради сечење на дрвјата во паркот и започнување на преуредувањето на локацијата за изградба на голем трговски центар. За кратко време протестите се претворија во антивладини демонстрации кои се проширија низ цела Турција и се заканија на мирот во земјата.