Членовите на Оперативниот штаб кој бил формиран во МВР за да се следат протестите „За заедничка Македонија“ морале секоја наредба да ја проследат до раководителот на оперативниот штаб, рече на судењето за 27 април полицаецот Тони Алексовски кој бил член на овој штаб, на прашањето на обвинителката Вилма Русковска дали членовите на оперативниот штаб биле должни да постапат ако добијат наредба од министерот за внатрешни работи.
Сведокот кажа и дека бројот на лица кои биле ангажирани во овој оперативен штаб се менувал како и командната одговорност .
На почетокот на март златната команда ја презел Митко Чавков тогаш директор на БЈБ , а бројот на членови се намалил на 17 од кои само по шест се задолжени секој ден да ги следат протестите.
Сведокот бил на годишен одмор на 27 април и не знаеше да одговори на прашањето на обвинетиот Александар Василевски Нинџа дали полицијата знаела дека на 27 април во ресторанот „Дион“ е собрана поголем група од различни градови од Македонина.
На прашањето на судијката Кацарска, сведокот кажа дека во моментот кога раководителот на оперативниот штаб е известен дека има настани како оние на 27 април, треба веднаш да дава наредби. Кацарска праша и дали во оперативниот штаб има телевизор, на што сведокот одговори потврдно, по што таа дополни дали воопшто некој требало да ги извести членовите на оперативниот штаб кога веќе се гледало дека лица ги прескокнуваат оградите и влегуваат во Собранието.
„Дали сте требале да чекате на златната команда за да реагирате кога веќе сте гледале што се случува, вие сте сепак полиција“, констатираше судијката.
Сведокот одговори дека прво, силите кои биле на терен требало да се справат, а ако побарале дополнителни сили наредбата ја дава раководителот на опертивниот штаб.
„Тие што се членови на оперативниот штаб не можат да дадат наредби и да повикаат дополнителни сили од дома, затоа што тоа можеби веќе го сторил раководителот“, одговори сведокот.
„Дали е спротивно на вашите акти ако некој се обиде да помогне на малкумината полицајци кои требаше да се справат со толпа на народ и дали тие можеа да ги заштитат животите на пратениците, затоа што и тие не беа многу ангажирани“, праша Кацарска.
„Најбрзо можат да дојдат полицајците од СВР Скопје, па од одделите за специјални полициски операции“, одговори сведокот, а нив да ги повика може началникот на СВР Скопје, додека силите за обезбедување на објекти и лица може да ги повика раководителот на оперативниот штаб.
На директно прашаење на Кацарска дали оперативниот штаб бил на висина на задачата, сведокот рече, „задачата не беше извршена“.