За да се расветлат погрешните толкувања што се случија последните денови, податоците на страницата на Светска банка се ажурирани за да ја одразат реалноста-тестовите за Ковид -19 не постоеја пред 2020 година, велат од Групацијата
Светска банка ги избриша податоците за набавките за Ковид-19 кои се однесуваа на 2018 година и ги замени со технички термини кои се користеле и претходно, заради, како што објаснуваат погрешното толкување во јавноста. Ваквата промена следува откако во јавноста имаше реакции и напади во смисол на тоа, како е можно Банката да набавувала реагенси на Ковид кога за вирусот не се знаело дотогаш.
За нашата држава беше наведно дека сме увезувале тестови и друга медицинска опрема, инструменти и апаратура потребна за дијагностичките процедури во вредност од над 9 милиони долари со вкупна тежина од над 6 тони.
Овие реакции, напади и масовни споделувања на социјалните мрежи беа особено изразени од подржувачите на т.н. Теории на заговор, но и кај сите оние кои имаат дилеми во врска со пандемијата или пак, не веруваат во вирусот.
Од Светска банка објаснуваат дека пред епидемијата со Ковид-19, многу медицински производи кои со години се следат во нивната база на податоци беа со технички термини, како на пример тестирањата кои се вршат со разни типови на реагенси.
„Кога тест комплетите за Ковид-19 беа развиени во јануари 2020 година, тие беа класифицирани од царинските службеници користејќи ги овие наследени класификации.
Во март 2020 година, со оглед на зголемената важност на овие производи во дијагностицирањето и лекувањето на Ковид-19, СЗО и Светската царинска организација(СЦО) издадоа список на клучни производи за Ковид-19 за полесно да ги следат. Тие им ставија на овие производи технички описи поврзани со Ковид, како што се “китови за тестови за Ковид-19 .” Оваа листа вклучуваше широк спектар на претходно постоечки медицински материјали вклучувајќи вентилатори и средства за дезинфекција на рацете.
Од истата причина за полесно следење, тимот на Светска банка создаде специјална база на податоци користејќи ја листата на Светската царинска организација (СЦО), заедно со новите називи и описи на СЗО и СЦО. Целта беше да се стават информации за клучните медицински материјали поврзани со Ковид на едно место за да можат лесно да се најдат.
Сепак, за да се расветлат погрешните толкувања што се случија последните денови, податоците на страницата на Светска банка се ажурирани за да ја одразат реалноста-тестовите за Ковид -19 не постоеја пред 2020 година.
Она што пред неколку дена беше означено како „ Ковид -19 сетови за тестирање “(со ознака СЦО ) сега е правилно означено како„ Медицински тестови “. Слични прилагодувања за разјаснување се направени и на друго место на веб-страницата.
Но, главната база на податоци ги задржува сите оригинални технички описи и називи што постоеле пред појавата на Ковид-19, се вели во соопштението.
Од Групацијата на Светска банка велат дека од почетокот на кризата преземаат големи и брзи активности за да им помогнат на земјите во развој да ги зајакнат своите системи за одговор на пандемијата и здравствената заштита.
„Ние веќе даваме итна поддршка на земјите кои сочинуваат 70 проценти од светската популација. Работиме на проекти кои имаат голем обем и влијание, им помагаат на земјите да спроведат итни „операции“ во здравството, да ги заштитат најсиромашните домаќинства и да ги зачуваат работните места и деловните активности, велат од Светска банка.
Со ова, се расчистија шпекулациите дека нашата држава набавувала тестови за Ковид -19 уште во 2018 година и дека знаела однапред за пандемијата.
Податоците дека сме увезувале тестови и друга медицинска опрема, инструменти и апаратура потребна за дијагностички процедури во вредност од над 9 милиони долари со вкупна тежина од над 6 тони, всушност покажуваат дека се работи за редовен увоз на медицински потрошен материјал и друга неопходна опрема која се користи во сите други медицински процедури, а кои бараат степен на заштита на медицинските лица. Уште пред да стигне објаснувањето од Светска банка, од Институтот за јавно здравје беа децидни:
„Во 2018 година набавуваме тестови за другите коронавируси, вклучително MERS и SARS, но не и за SARS Cov-2“.
ПСР тестовите и тестовите за скрининг на антитела не се измислени за време пандемијата со коронавирусот, туку постојат со децении и како такви се верификувани и во Фондот за здравство, а последната промена на цената пред појавата на пандемијата со Ковид -19 беше во 2013 година.