Вакцинациската нееднаквост продолжува низ светот и е повторно адресирана од страна на Обединетите Нации (ОН). Д-р Тедрос Аданом, генералниот директор на Светската Здравствена Организација (СЗО), која е дел од ОН, постави нови цели за како да се вакцинираат најсиромашните земји во светот.
„Тековната криза со вакцини претставува скандалозна нееднаквост што ја одржува пандемијата. Повеќе од 75% од сите вакцини се администрирани во само 10 земји. Нема дипломатски начин тоа да се каже: Мала група на земји кои прават и купуваат мнозинство од светските вакцини ја контролираат судбината на остатокот од светот,“ рече д-р Тедрос Аданом вчера во Женева.
Пред само две недели д-р Аданом посочи многу слични критики кон богатите држави кои, според него, се криви за „шокантниот глобален диспаритет“ во светската дистрибуција на вакцини.
Овој диспаритет станува многу јасен кога се споредуваат бројот на нови инфекции, стапката на смртност на Ковид-19 заболени, како и планираните политики за оваа есен, во посиромашните наспроти богатите држави. На пример, во Лос Ангенлес, Калифорнија планирано е комплетно да се отворат школите во есенскиот семестар заради високата стапка на вакцинација во САД. Сепак ќе постои и опција за некои деца да ги слушаат школските предмети од дома, но генерално планот на овој огромен американски град – кој исто така беше Ковид-19 „хот-спот“ во 2020 – е децата да почнат да одат на школо.
Оваа вест доаѓа брзо по веста од метрополата Њу Јорк, каде надлежните изјавија дека воопшто не планираат да понудат онлајн опција за децата од септември. Њу Јорк исто така беше еден од големите епицентри на пандемијата, а сега веќе повеќе од 60% од жителите на овој 18 милионски град имаат примено барем една доза од некоја од вакцините и почнато е олабавување на Ковид-19 мерки.
За разлика од САД, ако ги погледнеме статистиките во други држави на интерактивната мапа на The New York Times можеме многу јасно да го забележиме загрижувачкиот тренд за кој зборува д-р Тедрос Аданом. На пример, во Индија се администрирани 194,165,711 дози од Ковид-19 вакцини, што можеби изгледа како голема бројка но кога тоа ќе се спореди со популацијата на Индија (1.366 милијарди жители), јасно е дека само 12 вакцини се дадени на секои 100 луѓе. Во САД се дадени 86 вакцини на секои 100 луѓе, а во Велика Британија 91 на секои 100 луѓе. Во Нигерија е дадена само една вакцина на секои 100 луѓе, а некои афрички држави имаат добиено дури и помалку од тоа, како Судан и Алгерија.
Во С.Македонија се аплицирани 12 вакцини на секои 100 луѓе.
Држава која се истакнува како добар пример за тоа што го зборува д-р Тедрос Аданом е Израел, каде според интерактивната мапа обезбедени 117 дози за секои 100 луѓе. Односно Израел складира вакцини и не ги дели вишокот вакцини кои веќе ги има. Ова станува дополнително јасно кога ќе се погледне вакцинациската состојба на окупираните палестински територии кои The New York Times ги бележи само како „Палестина“, каде палестинците имаат добиено само 10 вакцини на секои 100 луѓе.
Ситуацијата во палестинските територии дополнително се комплицираше по 11 дневното бомбардирање на Појасот Газа од страна на израелските воени сили во последните недели каде беа убиени најмалку 243 палестинци. За време на овие напади исто така беа уништени многу згради во Појасот Газа, меѓу кои и медиумски канцеларии, но и клучни делови од инфраструктурата на оваа окупирана територија. Преку воздушните удари на Израел беше убиен важен палестински лекар, кој ги надгледуваше случаите со Ковид-19 во најголемата болница во Газа. Друг израелски воздушен напад, пак, ја оштети единствената лабораторија за тестирање за Корона вирусот во Газа.
Вакцинациската нееднаквост не се манифестира на исти начини низ цел свет, но секаде носи смртоносни последици. Решенијата за овој светски проблем се комбинација на редистрибуција на Ковид-19 вакцини, но и поголемо производство на вакцини низ светот. ОН апелира да се дуплира производството на Ковид вакцини за да се превенираат Ковид инфекции и смртни случаи, сметајќи дека масовната вакцинација е во интерес на сите.
За второто решение да стане реалност би морало да се ослободат патентите на веќе откриените Ковид-19 вакцини од страна на компаниите кои моментално се заштитени преку Светската Трговска Организација (СТО). Ова привремено ослободување на патентите би се случило преку одобрување на таканаречениот „TRIPS waiver“. Но, на почетокот на мај Германија ги блокираше преговорите во СТО ова решение и сѐ уште ја нема променето својата позиција на ова екстремно важно прашање.
Елена Гаговска