Фирмата „Хантерс“ ДООЕЛ Скопје се обврзала да ја асфалтира горната и долната улица „Пандо Кљашев“ која рано утрово потона во огромна дупка откако се урна потпорниот ѕид поради движењето на механизацијата на градежната фирма.
Во меѓувреме инспекциските служби на Општина Кисела Вода ги утврдуваат недостатоците околу безбедносните мерки што инвеститорот требало да ги направи. Градежните работи во моментов се стопирани, а на инвеститорот му е наложено прво да ја санира штетата, па патоа да почне со изведување на градежните работи.
Градоначалникот на Кисела Вода, Филип Темелковски во изјава за НОВА вели дека дозволата за градба била издадена овој месец, кога и започнале градежните работи. Меѓутоа на таблата за инвеститорот поставена на самото место стои дека одобрението за градба било издадено на 26 јануари, со правосилна важност од 5 февруари.
Темелковски тврди дека фирмата „Хантерс“ ги имала сите потребни дозволи и документи за градба од другите надлежни институции.
-Во моментов нема загрозени објекти, доколку се санира целата работа на време сметам дека нема ниту еден од објектите да бидат оштетени. Има оштетување мало на патот поради тежината на механизацијата која што се движела таму и тоа ќе му биде доставено на инвеститорот за да си ја врати во првобитна состојба улицата. Градежните работи се почнати овој месец, а дозволата, односно одобрението за градба е издадена во трети месец поточно овој месец со тоа што се уште нема издадено одобрение за сите објекти, таму треба да бидат три објекти според Деталниот урбанистички план. Од нашите инспекциски служби му беше доставено на инвеститорот што треба да отстрани, дел од работите биле отстранети. Ние дадовме опомена бидејќи се заложивме да нема веднаш пишување на казни. Инспекциските и правната служба ги проверуваат сите законски мерки што треба да се преземат и да се укаже на недостатоците при изведбата-вели градоначалникот Темелковски.
Тој вели дека Општината ќе бара од Министерството за внатрешни работи да се ограничи тежината на возилата кои што поминуваат оттаму за да не настане дополнителна штета и на другите објекти кои се таму.
НОВА утрово беше на самото место во Пржино. Жители ни изјавија дека уште во вторникот го блокирале патот за механизација и апелирале до полицијата и до инспекцијата на Општината да преземат мерки бидејќи потпорниот ѕид не може да издржи.
-Залудни беа нашите апели до полицијата и инспекцијата во Општината. Им рековме дека потпорниот ѕид не може да го издржи ова и дека ќе падне, а инспекторите ни се смееја. Ова е срамота. Не се трпи мафијата И еве што се случи од ветувањата на локалните избори дека ќе се спечат вакви градби-вели еден од жителите на улицата „Пандо Кљашев“.