Војо Младеновски има 61 година и тешка болест на срцето. Тој денеска по којзнае кој пат дојде во Министерството за здравство, за како што вели, да му биде исправена неправдата и да му го продолжат боледувањето кое му е прекинато бидејќи е неспособен за работа.
Здравствената состојба на овој човек е тешка. Неговото срце функционира само 25 проценти од вкупниот капацитет.
– По незнам кој пат дојдов да ми се продолжи боледувањето, односно Министерството да ми издаде конечно решение. Се работи за боледување кое Лекарските комисии во Тетово неправедно ми го прекинаа, изјави за НОВА, видно вознемирен и тешко дишејќи, Младеновски на излегување од Министерството за здравство.
Тој го достави барањето во архива, но никој од кабинетот на министерот Тодоров не го прими денеска.
Поради лошата здравствена состојба и вториот инфаркт кој го преживеал, по препорака на кардиолозите, Младеновски бил на боледување од ноември минатата година. Но, првостепената и второстепената Лекарска комисија во Тетово во април годинава му го прекинале боледувањето и процениле дека е способен за работа.
Младеновски во мај годинава поднел барање во Министерството кое било под мониторинг на Народниот правобранител, Хелсиншкиот комитет и Транспарентност интернешенел. По три месеци му било одговорено позитивно на барањето, со препорака Фондот за здравство во Тетово да го продолжи боледувањето и да ги исправат неправилностите.
Но, во ФЗО од Тетово не ја почитувале одлуката на Министерството за здравство и решението го одбиле како неосновано. По ова, Младеновски во септември поднел уште една жалба во Министерството за здравство и тогаш министерот Тодоров формирал комисија од тројца кардиолози за да се произнесат за случајот. Кардиолозите само ја потврдиле неговата здравствена состојба и процениле дека неправедно е прекинато боледувањето.
Младеновски во придружба на неговата сопруга дојдоа да го побараат конечното решение од министерот Тодоров, а сакаа да замолат и да се забрза постапката бидејќи здравствената состојба постојано му се влошува.
Од таму си заминаа без одговор.
Младеновски работи како наставник, со деца од прво до четврто одделение. Тој вели дека поради неговата болест и децата се изложени на стрес доколку падне и му слоши пред нив.
Овој човек бил одбиен и од комисијата за инвалидска пензија.
Младеновски е жртва на системот во кој институциите си ја префрлаат топката едни на други. Но, и типичен пример каде институциите не ги почитуваат донесените одлуки.
Неговата голгота продолжува, а дополнителниот стрес поради оваа ситуација, само ја влошува неговата и онака тешка здравствена состојба.