Како резултат на професионалните познанства и контакти со куратори од Солун, тимот на Музејот на современата уметност Скопје оствари работната посета на Солун, реализирана на покана од страна на водечките институции активни во областа на современата уметност.
За време на посетата, како што соопштуваат од МСУ, делегацијата имала повеќе значајни разговори за можната соработка со официјалниот домаќин, Државниот музеј на современа уметност во Солун и директорот на Музејот, Марија Цацаноглу, која изразила интерес за соработка со МСУ Скопје.
Исто така, претставниците на МСУ се сретнале и со директорите на Центарот за современи уметности и Музејот на фотографија.
-Во Центарот за современи уметности делегацијата на МСУ беше запознаена со плановите на оваа истражувачка единица и беше утврдено дека постои простор за директна соработка на Центарот со МСУ Скопје во научно истражувачката област. Во Македонскиот музеј на современа уметност во Солун пак, директорката на Музејот Тули Мисироглу нè запозна со особеностите на колекцијата на овој Mузеј, кој има сродна ориентација и оттаму и планови за идни соработки со МСУ Скопје, се вели во соопштението.
Тимот на МСУ Скопје бил примен и од заменикот градоначалничката на Солун, Ели Крисиду, одговорна за културата и уметноста во градот. Притоа била најавена секаква помош за идејата за соработка на уметничката сцена од двете средини. На состанокот во градското собрание учествувал и независниот менаџер во областа на културата и водач на невладината структура Artbox, Кристос Савидис, соопштуваат од МСУ.