Првиот човек на ТИРЗ Јован Деспотовски ги презентира активностите како и резултатите и ефектите од нив за првата половина од годинава во технолошко-индустриските развојни зони.
„Имаме значително покачување на бројките во делот на извозот во првите 6 месеци или во првото полугодие од годинава со износ од 1 милијарда 717 милиони евра што е поголем за 11,5 отсто од истиот период лани. Раст бележи и увозот кој за првите 6 месеци во областа на зоните ТИРЗ изнесува 1 милијарда и 600 милиони евра или за 4,3 отсто повисок увоз споредбено со истиот период лани, нагласи Деспотовски.
Како дополнителен показател кон позитивното работење во ТИРЗ Деспотовски го наведе бројот на вработени кој за прв пат ја надминал бројката од 15.000 и изнесува 15.016 или за 1.000 вработени повеќе од почетокот на годинава односно за 14 отсто повеќе од лани, што се должи на инвестициската активност минатата година, рече Деспотовски.
Тој се пофали дека минатата година , за прв пат просечната плата во ТИРЗ го надминала националниот просек.
Деспотовски се пофали дека во првите 6 месеци од годинава на планот на привлекување странски инвестиции, успеале да постигнат договор со американската компанија „Герас Хајмер“ која во сопствен капацитет овде ќе инвестира 126 милиони евра што ја прави најголема инвестиција воопшто откако постојат ТИРЗ иминативе 20 години.
„Веќе го потпишав решението за градба , сериското производство почнува во 2024 година. Ќе се произведува медицинско стакло. Нето платата за вработените што ќе бидат доминантно со средно образовние е 40.000 денари, соопшти Деспотовски, кој истакна дека засега се задоволуваат потребите од работен кадар но рече и дека е блиску времето кога пазарот на труд ќе се соочи со дефицит од одредени работни профили.
Деспотовски спомена дека периодов биле постигнати договори со уште 4 компании, чии инвестиции изнесуваат 240 милиони евра кои се во стадиум на финален потпис од Владата.
На почетокот на наредната недела очекуваат да почнат разговорите со многу моќна американска компанија која би требало да одлучи дали своето производство да го отвори тука во земјава или во Србија и Хрватска.
Тој најави дека очекуваат одговор од Владата за Скопје – 3 развојната зона , која очекува да развие добивка од милијарда и петстотини милиони евра во наредните години , инвестиции од 800 милиони евра како и илјдници нови работни места.
Деспотовски најави и две нови инвестиции кои биле од областа на автомобилската индустрија. Со едната разговорите се целосно заокружени останувало само да се формализира сето тоа.
Инвеститорите заинтересирани за инвестирање во ТИРЗ, веќе се распрашувале за протестите , но засега било далеку од тоа тие да повлијаат да биде сменета некоја инвеститорска одлука.
Мирјана Трпческа