Дваесетина пратеници од ВМРО ДПМНЕ на своите фесјбук профили објавија постови во рок од само неколку часа во кои пишуваат дека нема да гласаат за уставните измени во Собранието кои се предвидени со Договорот со Грција, без разлика каков ќе биде исходот на референдумот. Иако содржината на постовите не е идентична, пораката кај сите е иста – нема да поддржат промена на Уставот на државата со цел промена на Уставното име на Република Македонија. Најголем број од нив воопшто не го поврзуваат исходот од референдумот со одлуката да се гласа во Парламентот, туку се изјаснуваат дека нема да гласаат за уставните измени.
Меѓу пратениците кои објавија вакви постови на своите фејсбук профили се Владимир Ѓорчев кој пишува дека договорот со Грција е лош,отвора уште многу прашања и простор за нови блокади. „Јасен е ставот на народот, гласачите и членството против најавените измени за промена на уставното име на Република Македонија. Секако дека Македонија треба да биде членка на ЕУ и НАТО. Македонија тоа одамна го заслужува, а ВМРО-ДПМНЕ беше првата партија во независна Македонија која ги промовираше евро-атлантските интеграции. Членството на Македонија во НАТО и ЕУ, заедно со стратешкото партнерство со САД, остануваат приоритет на нашата надворешна политика“ пишува Ѓорчев кој на крајот од својот пост најавува дека тој како пратеник нема да гласа за уставните измени.
Пост со слична содржина објави и Јохан Тарчуловски кој напиша: „Се колнам во Бога, во верата и во својата татковина Македонија, дека безусловно ќе го почитувам и штитам македонскиот Устав, дека нема НИКОГАШ да гласам за негово менување и без приговор ќе ги извршувам заповедите на македонскиот народ, чиј народен избраник сум во македонскиот парламент. Во спротивен случај, нека бидам убиен од еден од моите собраќа Македонци со револверот или камата што овде ги целивам!“ напиша Тарчуловски.
Пратеничката Ане Лашкоска напиша дека поставените прашања на референдумот не заслужуваат одговор, а пратеникот Зоран Илиоски објави дека „како пратеник, немам ниту мандат, ниту овластување, а ни лична намера, да гласам за било какви измени во Уставот со кои би се променило уставното име на мојата Татковина – Република Македонија“.
Пратеникот Трајко Вељановски кој не е активен на социјалните мрежи сега се огласи на Фејсбук со порака дека нема да излезе на референдумот и очекува да апстинираат и мнозинството граѓани.
НОВА ТВ се обиде да стапи во контакт со поголем број од пратениците кои ги објавија постовите на своите фејсбук профили, но ниту еден од нив не сакаше да коментира.
Тивкиот бојкот сега преку пратеничката група добива и гласност коментира за НОВА ТВ Ѓулистана Марковска, поранешна пратеничка на ВМРО ДПМНЕ.
„Ваквите постови значат дека тие добиле задача од партијата да го не го притиснат копчето, без разлика каков ќе биде исходот на референдумот. Ако се повикуваат на народот, треба да почекаат да видат каков ќе биде ставот на народот и граѓаните од нивната изборна единица, па да се изјаснат. Целта е со ова е да се зголеми притисокот врз нивните гласачи да не излезат на референдумот и бојкотот да биде помасовен. Во државата во моментов имаме предизборна атмосфера – ВМРО ДПМНЕ води кампања дека ништо не чини и од народот бара да си го каже своето мислење, ако може седејќи во папучи дома“ вели Марковска.
Во овој контекст, Марковска прашува каков ќе беше исходот ако на рефрендумското прашање се додадеше: Доколку рефрендумот биде позитивен, ВМРО ДПМНЕ ќе се врати на власт“ – тогаш сите ќе излезеа на гласање констатира таа. Марковска ја поставува и дилемата како ќе постапи партискиот претседател Христијан Мицкоски – ако излезе на гласање, тоа ќе значи дека е на различна позиција со пратеничката група, а ако не излезе ќе ризикува дистанцирање од меѓународната заедница.
Партиското раководство на ВМРО ДПМНЕ отворено ги подржа пратенициите за јавно изразениот став дека нема да гласаат за уставни измени.
„Пратениците се најсилниот дел од ВМРО-ДПМНЕ. Тие ја чувствуваат вибрацијата на граѓаните. Тие се во секојдневна комуникација со граѓаните и штом решиле дел од нив вака јавно да го кажат својот став, значи дека тоа е она што го добиваат како повратна реакција од нив и сакаат тоа да го пренесат. Тоа е апсолутно за почит“ кажа Александар Николовски, потпретседател на ВМРО ДПМНЕ на денешната прес конференција.
За дел од партиското членство исто така нема дилема дека ваквиот настап на некои од пратениците на ВМРО ДПМНЕ е јасен знак дека директивата стигнала од еден центар, уште повеќе што сите објави беа постирани во ист ден. За нив е некоректно, првично да се излегува со став дека „секој треба сам да одлучи како ќе постапи на рефрендумот“, а потоа да се координираат вакви објави кои јасно повикуваат на бојкот. Партиски извори велат дека индикативно е што само неколку часа по постовите на пратениците, кои беа масовно споделувани со пораки за бојкот, почнаа во голем број да се објавуваат и погрдни коментари за оние пратеници кои не објавија вакви постови на своите фејсбук профили.
„Намерно се прави раздор и поделби на патриоти и предавници“ велат партиски членови кои сакаат да останат анонимни.
На партиската одлука да не се повикуваат граѓаните да гласаат на референдумот, туку да се остави секој сам да одлучува, се спротистави партискиот потпретседател Митко Јанчев кој кажа дека ќе гласа на референдумот против Договорот и членот на Извршниот Комитет Константин Богданов. И поранешниот вицепремиер Никола Тодоров се изјасни дека ќе гласа на референдумот на свое прашање, како и членот на Советот на град Скопје, Владо Поповски.
За да се изгласаат уставните измени потребно за нив да гласаат две третини од пратениците односно 80 пратеници. ВМРО-ДПМНЕ има 42 пратеници во Собранието.