Министерот Тодоров бил многу разочаран, но не чувствувал одговорност за смртта на малата Тамара, бидејќи како што рече направил се за девојчето да отпатува на операција во странство. По еден ден молк, Тодоров се појави во јавноста на отварање на логопедски центар во поликлиника Букурешт. Не кажа ниту збор за одговорност или оставка.
Вината сега се префрла на тимот од лекарите од Турција кои требало да се состанат и да закажат термин за операција, без да се објасни што се чекало цели три години.
„Чувствувам разочарување, но морам да објаснам дека не сум јас тој кој одолговлекував. Кога слушнав за овој случај кој навистина ме погоди ја викнав директорката на Фондот и таа се заложи, се најдоа средства. Беше повикан еден од врвните хирурзи за спинална хирургија од Турција кој рече дека операцијата не може да се изведе во Македонија и предложи да ја направи тим од експерти од различни болници Во Турција.Терминот требаше да биде одреден овие денови 8-ми или 9-ти февруари, за жал не издржа. Мислам дека се што беше во моја моќ да направам, направив дури повеќе од тоа, но, очигледно не било доволно Жалам за овој немил настан и искрено сочувствувам со семејството“, изјави министерот Тодоров.
Но, голготата на малата Тамара траеше цели три години, не само овие два месеца откако се заложил министерот. Нејзиното семејство безуспешно се обидуваше да ја добие битката со институциите и со лекарските комисии кои го одбиваа девојчето со образложение дека не се исцрпени сите можности во државата за лекување.
Иако и во Фондот и министерот Тодоров тврдат дека лекарите не нагласиле дека случајот е итен, на документите на малата Тамара од лекарскиот конзилиум кои биле издадени на 28-ми април минатата година стои дека е потребно итно лекување во странство. Тодоров не е информиран за ова и вниманието на јавноста го свртува за моментите, откако тој лично се заложил за случајот во последните два месеца.
„Јас ви кажав како се одвивал случајот откако јас се вклучив и како јас се заложив. Инаку, другиот дел од претходно треба да се испита дали имало итност , ако немало зошто немало итност, ако имало зошто не е постапено, тоа треба да се испита“, рече Тодоров.
Во Хелсиншкиот комитет кои ја имаат медицинската документација на Тамара потврдија дека во документите на Тамара стои дека треба итно лекување во странство.
„На 28-ми април минатата година е поднесено барање за лекување во странство каде е потенцирано дека се исцрпени сите можности за лекување во државата и дека е потребно итно лекување во странство“ велат во Хелсиншкиот комитет.
Од таму веќе најавија кривични пријави за членовите на Управниот одбор и директорката на Фондот за здравство за несовесно работење, а доколку постои согласност од родителите ќе поднесат предлог за кривично гонење против одговорните во Министерството за здравство.
И покрај тоа Првостепената комисија во Фондот го одбила барањето во април, а тоа го сторила и второстепената комисија во октомври. Под притисок на медиумите еден месец подоцна министерот најави дека случајот ќе се реши позитивно и дека државата ќе го плати лекувањето на малата Тамара во странство. Но, семејството решението од комисијата никогаш не го доби. Се остана на усно ветување и лични заложби на надлежните.