Центри за депресија во Здравствените домови низ цела држава, ќе отвара министерот за здравство Никола Тодоров. Во секој Центар ќе работи по еден психијатар, со цел превенција на депресијата и стигматизацијата. Потребата од вакви Центри, според надлежните била неопходна поради растечкиот тренд на депресијата во светот и кај нас за што главна причина на настанување се наведуваат псхичките и социјалните фактори од нашето опкружување.
Министерството за здравство во соработка со Клиниката за психијатрија изготви акциски план за отворање на центрите за депресија.
Во првата фаза на проектот, до крајот на месец октомври, ќе бидат отворени вкупно 7 центри, и тоа во поликлиниките во Букурешт, Јане Сандански, Ченто, Ѓорче Петров, како и во Битола, Демир Хисар и Велес.
Дополнително во трите последоватилни фази, кои се планира да завршат до февруари идната година ќе бидат отворени уште 29 Центри за депресија.
-Големиот број на Центри за депресија кои ќе им бидат на располагање на граѓаните, очигледно ќе бидат малку за да ги задоволат потребите на граѓаните, кои тонат во депресија и нерасположение поради сиромаштијата и безидејноста, коментираат психијатри за НОВА.
Воведувањето на 36 Центри за депресија е нов проект на Министерството за здравство. Но, дел од старите проекти кои се ургентно потребни се уште не се реализирани.
Во Македонија нема КОМА Центар. НОВА во повеќе наврати известуваше дека болните кои се во кома со месеци или години нема каде да престојуваат. Најчесто семејствата ги чуваат дома, поединечни случаи се сместуваат во Геријатрија, некои семејства успеваат да издејствуваат времено да ги сместат болните во болница. Трајно решение нема, а државата е единствена земја која се уште го нема решено овој проблем.
Основање на КОМА центар, беше приоритет и на оваа Влада. Иако во програмата за подигање на квалитетот на здравствените услуги стои дека КОМА центар ќе биде отворен до декември минатата година, од тоа се уште нема ништо.
Се уште нема ништо и од најавата за основање на транспарентна комисија за лекови на позитивната листа која беше најавена уште пред две години. Позитивната листа за лекови се уште не е сменета и во неа се наоѓаат лекови кои се одамна исфрлени од употреба во другите земји, а нема внесено нови современи лекови.