Министерот за здравство Никола Тодоров денеска не одговори зошто е затворена болничката кујна во Гостивар и зошто се дозволува храна на пациентите да им се носи од дома.
Затоа пак, на прес конференцијата пред новинарите зборуваше за отварање на Слободна здравствена зона и развивање на здравствен туризам, концепт кој ќе започнел да се реализира после три години.
„Денеска нема да одговарам на други прашања освен на тие поврзани со темата, има време и утре ќе има прес конференција и задутре, одговори Тодоров и веднаш ја напушти прес конференцијата.
Новинарите останаа без одговор дали генотипотипот од бактеријата Листерија која е пронајдена во полнилка на фирмата “Пекабеско”, фирмата која го снабдувала концесионерот на болничката кујна со месни производи, е иста како кај некои од заболените и починатите.
Дали има нови пријавени случаи на Листерија од Гостивар? Остана неодговорено и што покажале резулатите, дали генотипот на бактеријата изолиран кај девојката од Неготино е ист како во свинскиот врат на Екстра меин или пак, се работи за зараза од друг производител.
Овие резулати требаше да бидат готови уште минатата недела.
Во време кога во државата беснее жолтица, а луѓе умираат од опасната бактерија Листерија, министерот промовираше проект за Слободна здравствена зона по примерот на Јужна Кореја, Турција и Дубаи за привлекување на странски инвеститори за отварање кои треба да се заинтересираат да отвараат болници во чиј состав ќе има и Медицински факултет на англиски јазик.
Странските инвеститори, според концептот кој е предвиден за 2017 година, треба добијат поволности и десетгодишни ослободувања од данок и царински давачки..
Во првите 10 години македонските пациенти нема да имаат право да се лекуваат во овие болници.