Откако ја отвори телефонската линија „Ало докторе“ каде докторите делат совети на пациентите, Министерството за здравство отвори и Фејсбук страна за Здрава бременост.
Преку социјалната мрежа Фејсбук доктори гинеколози ќе одговараат на прашања, ќе даваат стручни совети и консултации за бременоста. Од Министерството соопштуваат дека прашањата ќе се поставуваат во коментар или во приватна порака, а одговорот се добива во приватна порака. Одговорите на најчесто поставуваните прашања ќе бидат и јавно споделени, без објавување на лицето што го поставило прашањето.
– Со ваквиот начин на комуникација овозможуваме директно и непосредно споделување на стручни медицински совети со идните родители, со цел заштита на здравјето на мајката и детето, велат од Министерството за здравство.
Гинеколозите кои ги контактиравме не беа информирани за ова и видно изненадени прво што прашаа беше дали има дискреција, како ќе го заштитат идентитетот кога Фејсбук страна може да се пробие и содржината да стане лесно достапна на секого.
– Не е проблем само дискрецијата, основа на секој преглед и консултација е директниот контакт со пациентот, велат гинеколози за НОВА, кои стравувајќи за своите работни места, не сакаат да се спомнат нивните имиња.
Проектот Ало докторе пак, се спроведува веќе трет месец. Лекари специјалисти од различни области им даваат совети за одредени болести на пациентите по телефон.