Фирмите ОРКА Холдинг и Метроплитен кои ќе стопанисуваат во наредните 20 години со дијализата во државата се обврзани да ја следат динамиката на порастот на платите на вработените кои ќе преминат да работат во приватниот сектор. Доколку сакаат да се вратат назад во јавното здравство тоа треба да го направат во рок од две години најавил денеска миниситерот за здравство Никола Тодоров.
-Концесионерот има обврска да им понуди да преминат во приватизираните центри, доколку тие не се согласуваат ќе останат да работат во јавните здравствени установи. Оние што ќе се согласат ставиме одредба дека концесионерот се обврзува да ја следи динамиката на пораст на платите. Платата која што ќе биде договорена не може да биде пониска, тоа е прашање кое ќе биде договорено меѓу концесионерот и вработените. Има уште една одредба да можат во рок од две години без распишување на огласи да може да се вратат повторно во јавните установи изјави Тодоров.
Концесионерите треба да изградат и нови простории за дијализа, а старите целосно да ги реконструираат.
-Најповолните понудувачи кои ги добија лиценците со важност од 1-ви јануари наредната година меѓу другото се обврзани да ги заменат сите нефункционални столови за дијализа постари од седум години, да обезбедат транспорт до центрите за дијализа во секој регион, да ги заменат старите апарти за дијализа, да понудат вработување во редовен работен однос на постојниот медицински кадар како и да ги следат и имплементираат сите нови достигнувања во медицината за третман и лекување на болните изјави министерот Тодоров.
Тој додава дека концесионерите ќе бидат задолжени да обезбедат 24 часовна приправност во центрите односно доколку на пациентот му е потребна дијализа надвор од работното време, тие да му бидат на располагање и да нема потреба болниот да се транспортира до скопските клиники за да му биде направена дијализа.
Двете фирми Метрополитен и Орка Холдинг добија по две лиценци за по два региони. Метрополитен ги доби скопскиот регион и регионот на источна Македонија кои ги опфаќа Куманово, Крива Паланка, Куманово, Делчево, Кочани, Струмица, Гевгелија и Штип.
Орка Холдинг ќе раководи со центрите за дијализа во југозападниот и полошкиот регион.
Одговарајќи на новинарско прашање за Ценатрот за дијализа во Струга каде вработените не сакаат да одат под концесија, Тодоров одговори дека таму под концесија ќе биде даден само амбулантскиот дел, а не и хоспиталниот.
-И ова беше резултат на шпекулациитедека вработените мора да преминат кај концесионерот, што е веројатно намерно креирано одговори Тодоров.
Сепак, тој не објасни зошто не биле прифатени забелешките на Здружението на бубрежно болни Нефрон и зошто тие не биле вклучени во процесот на изработка на Јавниот повик.
Од Нефрон се оградуваат од секаква одговорност доколку концесинерите не си ги исполнат во целост обврските или доколку дојде до несакани последици по сигурноста и здравјето на пациентите.