Лацио се засили за тековната сезона со Португалецот Нани. Крилниот фудбалер пристигна во Рим како позајмен играч од екипата на Валенсија која само за отстапката ќе добие два милиона евра. Лацијалите, пак, ќе имаат право на откуп на неговиот договор со тимот од „Месталја“ наредното лето. На „Олимпико“ во Нани гледаат адекватна замена за Балде Кеита кој реши да ја продолжи кариерата во Монако.
Средина менува и напаѓачот на Ливерпул, Дивок Ориги. Репрезентативецот на Белгија до крајот на сезоната ќе настапува како позајмен фудбалер во Волфсбург за што „црвените“ ќе наплатат околу шест милиони фунти. Во договорот меѓу премиерлигашот и бундеслигашот не е вклучена клаузула за обврска или ексклузивно право за откуп на играчот, па многу веројатно е дека Ориги ќе се врати на „Енфилд“ по завршување на сезоната.
Подзаборавениот португалски интернационалец, Хуго Алмеида (33), пак, во финишот на преодниот рок ја прифати понудата на Хајдук. Искусниот напаѓач се очекува да биде од големо значење за сплитските „били“ во борбата со Диамо Загреб и со Риека за највисок пласман во хрватскиот шампионат. Алмеида во минатата сезона играше за АЕК, претходно и за Порто, за Вердер и за Бешикташ. За Португалија има 57 настапи и 19 постигнати голови.