Шаторите пред Влада останаа и оваа трета ноќ по ред. Граѓаните се помасовно се собираат да им дадат поддршка на луѓето што кампуваат. Многу музика, креативна програма, како и говорници имаше и вечерва. Пред граѓаните, активистите и сите што беа дојдени за поддршка говореше потпретседателката на СДСМ, Радмила Шеќеринска.
„Сакаме да покажеме дека Македонија може да биде поразлична. Ги убивме во поим тие позади во Владата зашто им покажавме дека ова не е Македонија на човечиња, ги убивме со нашата радост, со нашата љубов. Во државата живеат луѓе кои сакаат промена и ние решивме дека ќе ја имаме вистината на нашата страна. Граѓаните со свои уши слушнаа како се добивале избори, како се влечеле за уши луѓе за да гласаат, судиите биле тука за некој да им пишува плусеви“рече Шеќеринска пред граѓаните.
Актерката Ирена Ристиќ ги потсети граѓаните зошто мора да си замине оваа Влада на чело со премиерот Груевски. Како што рече, тоа се лошите реформи, социјалната помош од 1600 денари, со која не може да се живее, заради ниските плати од 6000 денари на шивачките, заради Законот за хонорарците.
„Не може полуписмен човек да прави реформи во образованието бидејќи со тоа прави брутален експеримент со средношколците, а тие се нашата иднина“, рече Ирена Ристиќ.
Нема да си одам од оваа земја затоа што на Македонија и се случува будење, се случува ренесансна преродба, порача писателката Румена Бужаровска.
„Во последно време гледам будење , искра во очите на луѓето, насмевки полни со радост, гледам креативност, критичност. Тоа покажува дека се случува ренесансна преродба и сите треба да сме горди на тоа“, рече Бужаровска.
Говореше и активистот Жарко Трајановски кој нагласи дека активистите се коректори на секоја Влада.
„И во 2006-та година се кршеше Уставот но, сега тоа се прави 10 пати повеќе и никогаш порано не се исфралеле новинари како што тоа се направи на 25 декември во Собранието“, рече Трајановски.
Граѓаните порачаа дека остануваат тука додека не си замине оваа власт, а за Македонија не дојдат подобри денови.