Двајца од повредените во синоќешната престрелка меѓу партиски членови на ДУИ се наоѓаат на Клиниката за интензивно лекување и реанимација, тие се здобиле со прострелни рани од огнено оружје, потврдија за НОВА на хируршките клиники.
Едниот од нив има прострелна рана во рбетниот столб, а вториот е повреден во меките ткива и тој најверојатно ќе биде префрлен на Клиниката за пластична хирургија.
Третиот од повредените во престрелката е ранет во карлицата и во моментот е хоспитализиран на Клиниката за трауматологија.
Според информациите до кои дојде НОВА, тие се извлечени од шокова состојба, но за лекарите се уште е рано да прогнозираат било што за нивната здравствена состојба.
Неофицијално, престрелката се случила на партиски состанок на ДУИ кој се одржувал во огранокот во Сарај. Албанските медиуми пишуваат дека пресметката се случила по несогласувања помеѓу приврзаници на Рафиз Алити и Блерим Беџети. Извори за НОВА велат дека настанот се случил кога по вербалната расправија дел од присутните извадиле пиштоли и започнале да пукаат.