Постои опасност годинашниот буџет на Министерството за труд и социјала да се потроши пред време бидејќи најголем дел од исплатите кои заостанале од минатата година се плаќаат со пари од буџетот од 2016.та година. Причина за тоа е што минатогодишниот буџет бил испразнет пред време, велат во Министерството за труд и социјала.
Станува збор за исплата за детски додаток за ноември, додаток за трето и четврто дете, за породилно отсуство, за мобилност и слепило, постојана парична помош, цивилна инвалиднина, сместување во згрижувачко семејство, парична помош за студирање, за згрижувач и слично. Ден пред истекот на јануари Министерството успеало да префрли 311.588. 062 денари или повеќе од 5 милиони евра, долг кон овие корисници. Тоа се финансиски средства кои Министерството за труд и социјала ги должи кон најранливите категории граѓани.
„Ова сериозно ќе се одрази на буџетот од 2016 та година. Проблемот е во тоа што средствата во буџетот на Министерството се планирани за првите два, односно три квартали од 2015 та година, а за последниот квартал има нула денари, односно нема пари. Тоа не смее да биде така. Буџетот од 2016. та година со ова веќе е половина потрошен“, изјави на министерката Фросина Ременски на денешниот брифинг со новинарите.
Само на заштитните друштва кои вработуваат околу 3000 луѓе со инвалидитет средствата не им се исплатени од јуни. На нив со ставките од буџетот од оваа година Министерството треба да им исплати 200 милиони денари.
Од истите причини доцнат и исплатите и за породилно отсуство, велат во Министерството. Со пари од буџетот од оваа година успеале на 29 јануари да исплатат 68 милиони денари за октомври и 171 милиони денари за ноември, заостанат долг од минатата година.
Комуникацијата оди тешко со институциите, велат во Министертвото за труд и социјала. Од таму нагласуваат дека од Управата за јавни приходи чекале дури 75 дена за да ги добијат потребните податци за да можат да изготват решенија за 26 000 корисници на детски додаток за оваа година, за да можат да направат и уплата.
Минатата недела во НОВА во неколку наврати реагираа луѓе кои примаат додаток за мобилност(за инвлидитет)бидејќи не им стигнал финансискиот надоместок.
Министерството истиот ден(20.01. 2016) префрлиле 56.526.314 денари и за оваа категорија граѓани . Исплатен е и надоместокот за постојаната парична помош со вкупен износ од 30.164 313 денари.
Ова се само дел од финасиските средства кои од минатогодишниот се прелеале во овој буџет. Техничката министерка Ременски вели дека немаат никаква комуникација со заменик министерот Диме Спасов, за овие како и за многу други горливи прашања во ова Министерство. Ременски вели дека Спасов од ноември одбива да информира кои луѓе се наоѓаат во неговиот кабинет бидејќи тие што претходно биле се распоредени на други работни места, така што не може да се воспостави службена комуникација.