Турските жени оваа недела се побунија против сексизмот на турските политичари од исламо-конзервативната партија која е на власт во оваа земја. На социјалните мрежи тие објавија слики на нивните кондури за да ја поддржат Ајлин Назлиака, пратеничка од левата Републиканска партија на народот.
Во еден говор минатата недела социјалистичката пратеничка остро ги нападна своите колеги од Партијата на правдата и развојот (АКП) кои се на власт околу прашањата на дискриминацијата против жените во општеството. Таа се закани дека ќе им ја фрли својата кондура в лице.
“Се колнам пред Господ, ѓаволот кој е во мене бара од мене да извадам една од моите кондури и да ви ја фрлам. Но, кога ги гледам, мојата кондура и вас, си велам дека вие навистина ни тоа не го заслужувате”, им викна пратеничката на своите политички противници.
Во исламскиот свет фрлањето кондура, или само покажување на долниот дел од кондурата, се смета за навреда.
Ова обраќање ги охрабри Турчинките и голем број од нив реагираа на твитер објавувајќи го своите кондури и сандали под хаштагот #geliyorterlik што значи “папучата доаѓа”.
Оваа кампања уследи по полемиката што ја предизвика Булент Аринч, потпредседател на владата, кој им препорача на жените да не се смеат јавно на цел глас и побара од нив да биде “пристојни”.
Жените реагираа со објавување на фотографии со нивните широки насмевки.
Во текот на дебатата минатата недела во парламентот пратеничката Назлиака им замери на своите колеги од АКП дека го охрабруваат семејното насилство преку мерките што им ги наметнуваат на жените. Таа ги обвини исто така дека сакаат да знаат “што носат жените, што купуваат па дури и бојата на нивниот кармин”.
Нејзиниот текст беше отрфлен од парламентот каде што АКП има апсолутно мнозинство.
Реџеп Таип Ердоган, кој во недела беше избран на претседател на државата, е обвинуван дека сака да ја исламизира Турција.