Во заедничка акција на полициите на Србија и на Црна Гора, како што јавуваат српските медиуми, бил уапсен Дарко Шариќ, осомничен како еден од главните организатори на трговијата со дрога во регионот.
Тој околу 10 часот утринава веќе бил однесен во Специјалниот суд, јавуваат српските медиуми.
Шариќ се криеше долго во земјите на Латинска Америка, преминувајќи од една во друга земја, каде бил и пронајден. Откако го лоцирале тој бил однесен во Црна Гора каде бил и уапсен.
Во апсењето клучна улога имале српсаките специјалци, а во 12 часот во Владата е закажана конференција за новинарите.
Неговото апсење пред една недела го најави лидерот на Српската напредна партија Александар Вучиќ. Во 2010 година по Шариќ беше распишана меѓународна потерница.
Против него се покренати пет обвининија за трговија со наркотици и за перење пари.
Шариќ пред Специјалниот суд во Белград треба да се појави за прв пат на 24 март за кога е закажано продолжение на судењето на припадниците на неговата криминална група, која се терети за шверц на три тони кокаин од Латинска Америка во западна Европа во текот на 2008 и 2009 година.
По шест споени обвиненија против вкупно 39. членови од групата на Шариќ, во обвинителна клупа ќе седнат 11 лица, бидејќи 16-мина се во бегство, девет ја признале вината, а тројца се добиле статус на заштитен сведок.
На Дарко Шариќ и лицата вмешани со неговиот криминал изминатите четири години им се одземени недвижнини, луксузни вили, куќи, станови, локали, земјишта, претпријатија, хотели, автомобили, како и целиот инвентар.
Трагата на до скоро најбараниот Балканец му се губи во октомври 2009. година во текот на акцијата „Балкански воин“, која се одвиваше во исто време и во Уругвај и во Белград и до сега му беше судено во отсуство.