Сопственикот на порталот Буревесник, Зоран Божиновски, кој се бара како еден од осомничените во случајот Шпион, е уапсен во Нови Сад, Србија.
Според информациитe, телефонски било известено и македонското МВР, кое ја ја потврдило информацијата, додавајќи дека Божиновски е изведен пред надлежниот судија.
Потоа, според процедурата МВР треба да добие и писмено известување и да ја започне процедурата за екстрадиција.
Дента, по апсењето на 17 осомничени за Шпион Зоран Божиновски, за НОВА изјави:
– Негирам дека сум инволвиран во шпионирање за странски служби, бидејќи сите информации што ги имам јавно ги објавувам на мојот портал Буревесник.
Во акцијата Шпион 2о лица се обвинети и уапсени за злосторничко здружување, измама и изнуда: Марјан Маџовски, шеф на Кабинетот на претседателот на Собранието на РМ од 2005 година, Мичо Насковски, екс-генерален директор на Бетон, Ване Цветанов, екс директор на Агенција против перење пари, генерал Горан Стојков, Аце Диневски поранешен функционер од Агенцијата за разузнавање, беше приведен режисерот Борис Дамовски, авторот на анимираниот сатиричен филм „Еднооки“ но вечерта пуштен.
Истражниот судија во Основниот суд Скопје 1 им одреди мерка притвор од 30 дена на 16 притворени во акцијата “Шпион”, додека, пак, на вработениот во Државниот архив, поради влошената здравствена состојба, му бил одреден домашен притвор.
Притвор во отсуство им е одреден и на тројцата од осомничените, по кои сe уште се трага.
Тие се товарат дека им одавале информации на странски безбедносни служби, главно од една соседна земја, а се занимавале и со измами и уценувале јавни личности и лица од бизнис заедницата.
Истрагата за овој случај, бидејќи се работи за документи од државен карактери и со различен степен на тајност, ќе се води зад затворени врати.
Три дена по големата акција на апсење, министерката за внатрешни работи Гордана Јанкуловска денеска во Собранието образложувајќи ја широката полициска акција „Шпион“, во која за шпионажа, изнуда и злосторничко здружување се обвинети над 20 луѓе, истакна дека зачудува поклопувањето на ставовите на опозицијата со оние кои доаѓаат од една наша соседна држава.
„Тие веројатно ќе објаснат дали постои координација или станува збор за коинциденција“, рече Јанкуловска.
Таа истакна дека целокупната јавност е сведок на реакциите кои доѓаат од соседните земји, како и внатре од Македонија.
Ден претходно, Канал 5 објави информација дека унгарската разузнавачка служба била главен клиент на осомничените за шпионажа иако се споменува и грчката и руската служба.
Министерството за внатрешни работи на Македонија на барање на судот, на 21 септември распиша меѓународна потерница за тројцата осомничени кои се недостапни на полицијата во случајот „Шпион“.
Претходно, на сите тројца истражниот судија им одреди мерка притвор во отсуство.
Еден од тројцата беше и Зоран Божиновски, уредник на порталот Буревесник.
Тој тогаш на социјалната мрежа Фејсбук напиша:
„Признавам јавно: Се што правам последните седум години е раск..цување на наркодилерската извршна власт во Република Македонија… Нека распишат потерница по мене, па во процедура ќе си дојдам во Скопје да се соочиме со Мијалков и Груевски. Ако сакаат циркус ќе го имаат допрва. Мислев до денес немам рејтинг, дека не сум фактор, дека не ме бива, дека сум утнал се. А тоа полн погодок!“
