Основно училиште „Св. Климент Охридски“ денеска го слави патрониот празник. Екипата на НОВА го посети неговиот клон во Визбегово, училиште кое се наоѓа на само шест километри од центарот на градот. Училиштето беше празно, но лошите услови во кои учат 17 –те деца од ромска националност се очигледни. Вратите и прозорците се искршени, а како заштита од ветер и студ наместо стакла има залепено најлони. На местото на шахтата има опасна дупка во која може да се повредат децата, на зидовите има испишано навредливи пораки, дворот е запуштен.
Секој ден децата од Момин Поток пешачат по два километри во двата правци, за стигнат во училиштето во Визбегово. Нивните родители се жалат на лошите услови во кои учат децата. Наставата се изведува од 9 до 11 часот, а во двете адаптирани училници настава следат по две паралелки, децата од прво и трето, и од второ и четврто одделение заедно.
Во општината Бутел признаваат дека во Визбегово има потреба од ново училиште,но велат не е исплатливо да се инвестира во старата зграда. Се надеваат дека надлежните институции ќе помогнат финансиски , во спротивно, велат дека ќе чекаат во септември 2014 да заврши изградбата на новото училиште„ Живко Брајковки “во Бутел, а потоа да се започне со реализација на планот за изградба на ново училиште во Визбегово.
Директорката на училиштето, чиј клон НОВА го посети, не беше достапна да одговори зошто на прозорците на ова училиште нема стакла и како планираат да се изведува настава во текот на студената зимата. Оние семејства од Визбегово кои имаат финансиска моќ, децата со возила ги носат во училиштата во другите населби. Децата од албанска националност патуваат менувајќи два автобуси до населбите Бутел и Север каде што има двојазична настава. Само Ромските деца се оставени сами на себе во училиште кое не ги задоволува основните услови за работа.