Претставниците на двата фудбалски великани кои ќе одиграат натпревар во рамките на Суперкупот во Скопје, Емилио Бутрагењо (Реал Мадрид) и Луис Саха (Манчестер Јунајтед), денеска на официјална прес конференција на Арената „Филип Втори“ го најавија спектаклот.
„Многу сме возбудени што можеме со вас, во оваа држава да ја споделиме страста за фудбалот. Зборуваме за еден меч кој ќе биде голем, зборуваме за два од најголемите клуба. Манчестер јунајтед е силна екипа и ќе имаме тешка задача, но многу сме задоволни што сме тука“, рече Бутрагењо.
Како што информираше тој, Реал нема да се штеди во Македонија, и по Лигата на Шампионите и Примера, ќе се обиде да освои уште една титула и тоа токму во Скопје.
„Би сакал да ги споделам страста и желбата кои Јунајтед ги имаа оваа сезона. Тоа беше наша одлука која ќе ни помогне и против Реал Мадрид. Чест е да се игра овој дуел и можам да кажам дека играчите се веќе мотивирани за следната сезона“, изјави Саха, кој исто така најави дека Јунајтед нема да игра ревијален меч туку ќе се бори за титула.
„Реал Мадрид има добри играчи и самодоверба по освојувањето на ЛШ и Примера, видете го Кристијано Роналдо кој секогаш има желба за победа. Тие се фаворити, но и ние имаме шанса и се надеваме дека ќе победиме на овој натпревар. Целта е да се опоравиме и останеме мотивирани“, рече Саха.
Суперкупот на УЕФА се игра на 8.август со почеток во 20:45 часот.