Даночните служби на Управата за јавни приходи во текот на вчерашниот ден во Скопје изрекле мерка времено затворање за вкупно 11 деловни објекти во населбите Автокоманда, Сингелик и Маџари, затворен е и познат хотел во центарот на Скопје, информираат од УЈП.
Регистриран е еден случај на обид за спречување на контрола на фискализација во познат маркет, на патот Сингелик-Арачиново. При контролата, даночниот обврзник се обидел да ја уништи сопствената финансиска документација која била предмет на проверка, а во која даночниците утврдиле прикривање на готовинскиот промет. Но и покрај тоа, службите на УЈП успешно ја завршиле контролата.
На осум субјекти во Охрид им е изречена глоба и времена мерка забрана за вршење на дејност, дел од нив од стоматолошката дејноста.
Според податоците и она што е утврдено на терен од почетокот на годината, најголем даночен ризик од 27 % е забележан кај субјекти кои вршат спортски и забавни дејности (фитнес, аеробик и сл. клубови), 14 % кај козметички и фризерки студија, 11 % кај фото студија, 9.59 % спортски обложувалници и како помалку ризично (под 7 проценти) вршењето на стоматолошка и офтамолошка дејност.