Украинскиот Парламент го одобри нацрт-законот за амнестија на демонстрантите, поддршка дадоа 232 пратеници, од 416 присутни.
Сепак опозицијата не гласаше бидејќи се незадоволни од тоа што Законот предвидува амнестија за демонстрантите, под одредени услови, односно амнестија за сите учесници во немирите за време на масовните протести, освен за извршителите на тешки криминални дела.
Согласно текстот демонстрантите треба да ги ослободат од нив окупираните државни згради во Киев и земјата во рок од 15 дена за да бидат амнестирани.
Протестите во Украина ескалираа откако владата на Јанукович одби да склучи договор за соработка со ЕУ со цел да ја зацврсти врската со Русија. Оттогаш наваму, демонстрантите го обвинуваат Претседателот на Украина за корупција, прекршување на човековите права и лошо владеење.
По разговорите во Киев со претседателот Виктор Јанукович, шефицата за надворешна политика на Европската унија, Кетрин Ештон, повика сите страни да стават крај на насилството и заплашувањето.
Рускиот претседател Владимир Путин и германската канцеларка Ангела Меркел синоќа телефонски разговарале за Украина. Од канцеларијата на Меркел соопштуваат дека канцеларката го повикала Путин да помогне Украинците да се согласат на конструктивен дијалог. Од Кремљ, пак, соопштуваат дека за Путин е неприфатливо мешање однадвор.