Со вооружени возила низ улиците, и наводите дека воени трупи го држат под контрола аеродромот, градот Краматорск во источна Украина е центарот на тензиите помеѓу украинските сили и про-руските сепаратисти.
Засега нема известувања за жртви, а локалното население е во дирктен контакт со војниците.
Сепак, еден ден откако украинската војска ја започна првата, официјална акција против сепаратистите кои ги заземаа зградите на градските управи и седиштата на полициите во најмалку 11 градови, меѓународната заедница стравува дека и понатаму е можна ескалација на насилство.
Рускиот претседател Владимир Путин во телефонски разговор со германската канцеларка Ангела Меркел, во вторникот предупреди дека доколку ситуацијата ескалира, тоа ќе придонесе за граѓанска војна во Украина.
Денеска во седиштето на НАТО во Брисел ќе се сретнат амбасадорите од Алијансата за да ги разгледаат опциите.
Состанокот доаѓа еден ден пред средбата на американскиот државен секретар Џон Кери во Женева, со шефот на руската дипломатија Сергеј Лавров и претставничката на ЕУ, Кетрин Ештон.