Советот на замениците на европските министри денеска ги продолжија разговорите за ситуацијата во Украина во присуство на актуелниот министер за надворешни работи на земјата, Андри Дешчитсија.
Дешчитсија ја потврдил посветеноста на Украина да ги имплементира реформите и да се зацврсти состојбата со човековите права, како и демократското функционирање на институциите во земјата во согласност со вредностите на Советот на Европа, соопштуваат оттаму.
Советот го разгледувал и ад хок извештајот изготвен по нивно барање од страна на Советодавниот комитет за заштита на националните малцинства, откако делегација на Комитетот беше во посета на Украина од 21 до 26 март годинава.
Во поглед на прашањата од извештајот, замениците на министрите побарале гаранција за правата на припадниците на малцинствата низ цела Украина, не само во Крим, повикувајќи го Комитетот и понатаму да врши мониторинг за ситуацијата во која тие се наоѓаат.
Оттаму истакнале и дека нелегалниот референдум спроведен во Крим на 16 март, и нелегалното припојување на Крим со Русија, не смеат да значат никаква промена за статусот на Крим или статусот на градот Севастопол.