По судирите помеѓу украинските безбедносни сили и про-руските активисти во Славјанск, немирите се проширија и во Одеса, каде околу 1.500 радикални приврзаници на киевските власти и навивачи на локален фудбалски клуб се судриле на плоштадот во центарот на градот.
Младинци вооружени со синџири, стапови и штитови се обиделе да одржат марш низ централните улици на градот скандирајќи „Смрт за непријателите“ и „Русите на нож“, а по нив тргнала колона од активисти на организацијата „Куликово поле“, која обвинува за узурпирање на власта во Украина и се залага за референдум за федерализација на земјата и признавање на рускиот јазик за официјален.
Судирите се прошириле и биле фрлени и „молотови коктели“.
Најмалку 38 антивладини активисти загинале во пожар во синдикална зграда во Одеса. Зградата ја запалиле антируски радикали.
Русија денес побара итна помош од ОБСЕ, како би се спречила одмаздата која рано утрово во Славјанск ја започна украинската војска. Советот за безбедност на Обединетите нации на барање на Русија свика итен состанок, поради новата ескалација на насилствата во источна Украина.