Опозицијата во Украина повика на нови масовни демонстрации против одлуката на претседателот Јанукович кој го одби Договорот за соработка со ЕУ, со цел да остане во добри односни со Москва, пренесуваат странските медиуми.
Лидерите на опозицијата повикуваат на масовна излезеност на Плоштадот на независноста каде што минатиот викенд се собраа стотици илјади граѓани.
Но, овој пат се очекува раст на тензиите, бидејќи како што известуваат светските агенции, властите планираат контра-протести. И оттаму се децидни на „нон-стоп протести“.
Демонстрантите се на Плоштадот на независноста во главниот град Киев повеќе од три недели откако Јанукович се реши да не потпише договор со ЕУ.
Засега, и американските и европските политичари јавно дадоа поддршка на опозицијата. Американскиот сенатор, Џон Меккејн вчера пристигна во Украина на разговор со Витали Кличко и другите лидери од опозициските партии. Меккејн ги опиша протестите како „неверојатен доказ за патриотизам“.
Јанукович следната недела патува во Москва, каде што ќе се сретне со рускиот претседател Владимир Путин.