Вооружени луѓе ја зазеле зградата на регионалната влада и зградата на парламентот во Крим, Украина, каде вчера имаше судири меѓу проруските сепаратисти и следбениците на новите украински лидери.
Тежиштето на украинската криза се пренесе од Киев во Крин, во Симферопољ, каде вчера загинаа двајца во судирите меѓу татарските и руските демонстранти, првите ја поддржуваат власта во Киев, а другите не ја признаваат, јавува Интерфакс.
На покривот од зградата на парламентот во Крим се вее знамето на Русија. Овој објект, во кој се сместени Врховната Рада и Советот на министри на Крим, е завземен од околу 60 вооружени лица, кои немаат препознатливи ознаки на облеката.
Од Русија доаѓаат контроверзни сигнали. Претседателот Владимир Путин вчера изнанадувачки ја стави армијата во борбена готовност во западниот и во централниот дел на земјата.
Голем дел од руските трупи треба да бидат во борбена готовност, соопшти министерот Сергеј Шојгу без да наведе причини за ваквата наредба со која се погодени и регионите на границата кон Украина.
Многу Украинци стравуваат дека по промената на власта во нивната земја, Русија би можела воено да се вмеша. Москва не го признава легитимитетот на новите властодржци во Киев.