Лидерите на опозицијата во Украина синоќа побараа од претседателот Виктор Јанукович јавно да соопшти што и е понудено на Русија во замена за големите економски бенифиции.
Лидерот на проевропската опозиција Виталиј Кличко пред демонстрантите изјави дека Јанукович ја предал украинската независност.
– Тој се откажа од украинските национални интереси- се откажа од независноста, рече Кличко.
Според најновите сознанија на Кличко, Јанукович за време на разговорите со рускиот колега Владимир Путин „се согласил на помош од Русија така што ги дал украинските електрани, стратешката индустрија, тешката индустрија, воздухопловството и производителите на енергија“.
– Сакаме да знаеме што точно дал како колатерална штета и кои се неговите причини за да го направи тоа, истакна Кличко и побара вонредни избори.
Деталите од вчерашниот договор во Москва меѓу Јанукович-Путин не се соопштени.
Десничарскиот опозициски лидер Олег Тјанибок наведе дека претседателот „ги ставил во залог сите економски сектори“.