Рускиот министер за надворешни работи, Сергеј Лавров денеска нагласи дека нацрт мировниот договор што Киев ѝ го предложи на Москва содржи „неприфатливи“ елементи. Тој додаде дека Русија, сепак, ќе продолжи со преговорите и ќе работи на исполнување на сопствените безбедносни барања.
„Мировните разговори меѓу Москва и Киев не напредуваат толку брзо како што се посакува“, рече Лавров, обвинувајќи го Западот дека се обидува да влијае со привлекување внимание на наводните воени злосторства за кои Москва негира одговорност.
„Украина во средата предложи мировен договор што отстапува од претходно договорените предлози од двете страни. Оваа неможност повторно да се постигне договор ги покажува вистинските намери на Киев, да се повлече од договорот и да ги расипе преговорите бидејќи се откажува од договореното“, рече Лавров.
„Предлозите на Киев се неприфатливи“, нагласи тој.
Официјален Киев сè уште не ја коментираше изјавата на шефот на руската дипломатија.