Ден наречен “ден на јавно незадоволство” се одржа вчера во Будимпешта. Околу 10.000 луѓе излегоа на улиците на главниот град на Унгарија за да го покажат своето незадоволство од владата на премиерот Виктор Орбан, корупцијата, обидите да се воведе данок на користењето интернет и обидите на унгарската влада да се доближи до Русија.
Загриженост околу обидите за доближување до Русија вчера покажаа и жителите на Прага преку протест кој се совпадна со 25 годишнината од Кадифената револуција на Чехословачка која на оваа земја и донесе демократија ослободувајќи ја од советскиот јарем.
Според сајтот ЕУОбзервер, во Будимпешта манифестантите бараа оставка на Орбан обвинувајќи го дека е се повеќе авторитарен и одбивајќи да платат данок за интернет со слоганот – “не сакаме да плаќаме данок за криминалци”.
Овој данок беше најавен минатиот месец и веќе предизвика протест на 100.000 луѓе во Унгарија. Истовремено американската администрација најави дека им забранува влез во САД да шестмина високи функционери на Унгарија помеѓу кои луѓе задолжени за даночната политика.
Вчера манифестантите извикуваа и слогани против унгарското доближување до Русија преку плановите да се почне изградба на гасоводот Јужен тек кој е против европските правила на внатрешниот пазар на ЕУ и нејзините закони за компетитивност.
Истовремено дојде и изјава на новиот романски претседател Клаус Јоханис кој во неделата победи на изборите. Тој изјави дека унгарското свртување кон Русија не е насоката кон која тој сака да ја води Романија. “Мојата насока е Западот. Она што се сега се случува во Романија не е демократија која оди во вистинската насока”, рече тој.
Протестот во Прага избувна при прославата на Кадифената револуција со присуство на претседателот Милош Земан. Конфликтот во Украина тој го опиша како «граѓанска војна помеѓу две групи граѓани на Украина» што е позиција која ја дели Русија. Земан исто така повика на повлекување на санкциите на ЕУ против Русија во контекст на украинскиот конфликт.
На протестот во Прага се извикуваше «долу Земан» и «не сакаме да бидеме руска колонија».