Голем број бегалци ноќта ја поминаа на отворено, а на ризичните категории, децата и старците им се препорачува да се засолнат во кампот во Идомени, бидејќи ноќите се студени и врнежливи.
Од УНХЦР велат дека бројот на бегалци кои не се пропуштаат да влезат во Македонија постојано варира, бидејќи многу од нив, особено жени и деца поради лошите временски услови, со автобуси се враќаат назад во Атина.
Селекцијата по националност не е добар механизам одредување на статусот на бегалците, затоа УНХЦР апелира протокот на бегалци да не се сведува на ваквиот начин на пропуштање или задржување на граница. Сепак, ова е одлука на државните власти и тоа не само на Македонија, туку и на Србија, Хрватска и Словенија, велат за НОВА во претставништвото на УНХЦР во Македонија. Ова создава домино ефект и ситуацијата е статус кво, без најава дека наскоро ќе има некаква промена.
На Табановце во моментот се поставуваат две гумени хали, со капацитет од околу 200 луѓе, за оние бегалци кои веќе влегле во државата. Тие поминуваат низ три филтри за идентификација, на македонско –грчката граница, во прифатниот центар во Гевгелија и на Табановце. За нив има обезбедено ќебиња, храна и хигиенски пакети. Бегалците на границата со Грција кои не се пропуштаат и понатаму одбиваат било каква хуманитарна помош, освен медицинска помош која од утринава им ја пружат екипи на Црвениот крст.
Од УНХЦР велат дека приливот со бегалци е намален, на што влијаат повеќе фактори, а еден од нив е пристигнувањето на помалку чамци на островите во Грција поради лошите временски услови.