Денеска како Унија на млади сили на ВМРО-ДПМНЕ одбележуваме 31 година од нашето постоење, централниот настан ќе се одржи во Прилеп бидејќи пред 31 година на 6ти и 7ми април се одржал партискиот конгрес на кој е донесена одлука за формирање на младинска организација на ВМРО-ДПМНЕ, вели Сергеј Попов, претседател на Унијата на млади сили на ВМРО-ДПМНЕ во интервју за Алфа.
Попов рече дека вечерва под мотото „Визија за победи“ ќе се промовира за прв пат документ односно стратегија за младите во сите сфери од општествениот живот.
Вечерашниот настан ќе се одржи под мотото „Визија за победи, шанса за промени“ бидејќи на младите им е доста од наметнати порази и поради тоа што вечерва за прв пат во историјата на независна Македонија како Унија на млади сили на ВМРО-ДПМНЕ ќе промовираме наш програмски документ односно стратегија за младите насловена „Визија за победи“.
Стратегијата за млади насловена „Визија за победи“ е изработена од активисти на унијата, и во консултација со пошироката јавност и невладини организации, младински организации и експерти. Во „Визија за победи“, посочува Сергеј Попов, тие всушност објаснувааат како го гледаат патот по кој треба да се движи Македонија и тоа во сите сфери од младинското живеење, како што е спортот, културата, образованието, медицината, младите земјоделци, младите лекари.
На прашањето што предлага Унијата на млади сили на ВМРО-ДПМНЕ за подобрување на образовниот процес во државата, Попов рече дека во образованието во државата се потребни реформи во кои ќе бидат вклучени сите партии, и експерти.
Унијата на млади сили на ВМРО-ДПМНЕ образовните реформи ги гледа како непартиски процес кој не смее да биде дел од дневно политичките преписки помеѓу политичките противници, туку го гледаме како процес кој што треба да произлезе од јавна дебата во која што ќе бидат вклучени сите политички партии, сите општествени чинители, сите експерти кои што можат да дадат своја експертиза во насока на образовните реформи, подвлече Попов.