Синдикатот на работниците од управата, правосудните органи и здруженијата на граѓани на Република Македонија (УПОЗ) побара итна и неотповиклива оставка од претседателот на Сојузот на синдикати, Живко Митревски бидејќи смета дека злоупотребил својата позиција и на своја волја потпишал Меморандум со ВМРО-ДПМНЕ, без одлука на Претседателството или Советот на ССМ што е во спротивност со Статутот и Програмата на ССМ.
– Синдикатот на УПОЗ најостро реагира на штетниот и дрзок чин на Живко Митревски, кој за свои потреби и лични привилегии, го турка синдикатот во партиски канџи. Без консултации, самоволно, тој на своја рака го потпишал Меморандумот за соработка со политичката партија ВМРО – ДПМНЕ. За вакво вртење на курсот и занемарување на заложбите на синдикатот да ги штити правата на работниците, а не на партиите, мора да одлучи и заседава Претседателството и тоа со консензус, а не со надгласување или Советот на ССМ како највисок орган. Митревски, Вие ја злоупотребивте функцијата претседател на ССМ и затоа бараме веднаш Ваша неотповиклива оставка, затоа што Вие не се борите за работниците, туку за вашите лични интереси, велат од УПОЗ.
Освен со ССМ, лидерот на ВМРО-ДПМНЕ, Никола Груевски неодамна потпиша Меморандум и со Самостојниот синдикат за образование, наука и култура на Република Македонија, Конфедерацијата на слободни синдикати на Македонија и Сојузот на здруженијата на пензионерите на Македонија за кои рече дека како досега, така и во иднина ќе му помагаат при креирањето на политиките.