Уште две лица од Бугарија се самозапалија во очај поради големата сиромаштија, со што бројот на лица кои прибегнаа кон ваков начин на протест за последниот месец порасна на шест, јавуваат бугарските агенции.
Една од двете жртви, невработен маж и татко, се полеа со бензин и се запали во селото Ситово на североистокот на земјата, јави АФП.
Тој е префрлен во болницата во Варна со 95 отсто изгореници на кожата, изјавил началникот на здравствената установа д-р Ивајло Вижаров.
“Доста ми е, нема леб, неможам веќе ова да го поднесам“, ова се последните искажани зборови велат од медицинскиот тим.
Ова е само еден во низата случаи на самозапалување во Бугарија, по што по тој повод православната црква издаде соопштение во кое ги повика луѓето да ги решаваат проблемите на друг начин.
Втората жртва е 59-годишен рудар, кој останал без работа и се запалил вчера пред својот син .