Милан враќа уште една своја легенда на „Сан Сиро“. Поранешниот репрезентативец на Бразил, Кака (36) ќе биде нов директор на „росонерите“, потврди Леонардо, спортски директор на седумкратниот европски првак. Извонредниот играч за врска се очекува во Градот на модата пред крајот на септември за да добие инструкции за управување со клубот.
Кака во два наврата во кариерата беше член на Милан. Последните три сезони ги мина во дресот на Орландо сити пред да објави дека се повлекува од фудбалот во декември во минатата година, а новата улога што му беше понудена од Леонардо ја прифати без размислување.
„Изрази желба прво да се прилагоди на новата позиција. Тој е мој миленик, го почитувам и секогаш ќе има врска со клубот. Има голема желба да се приклучи на клубот“, рече Леонардо на денешната прес-конференција во Милано на која беше претставен и Паоло Малдини како директор.
Леонардо потврди дека идни чекори не се планирани и во шега истакна дека обуката на Кака ќе биде бесплатна. Враќањето на дел од некогашните звезди на Милан доаѓа по повлекување на кинеските бизнисмени од клубот, а самото именување на Леонардо, на Малдини и сега на Кака е во функција на кам-бек на „росонерите“ на старите патеки на слава. Поранешниот генерален директор, Марко Фасоне и и спортскиот директор, Масимилијано Мирабели се сменети од позициите пред две седмици.