Државната изборна комисија денеска усвои Стратешки план за периодот 2021-2024 година, со којшто се поставуваат цели за унапредување на работата на Комисијата преку одржување на кредибилен изборен процес, континуирано унапредување на изборниот процес и постојана поддршка на сите учесници во изборниот процес и остварување на нивните избирачки права.
-Свесни сме за предизвикот пред кој се наоѓаме и токму затоа подготвивме стратешки план што ќе одговори на сите отворени прашања притоа следејќи ги сите универзални норми и принципи. Стратешкиот план е производ на заложбите, разговрите и сугестиите на сите вклучени во изборниот процес се со цел да се организираат фер, слободни и демократски избори, рече претседателот на Комисијата Александар Даштевски.
Потпретседателката на Комисијата Дитмире Шеху објасни дека во Стрешкиот план се предвидени седум приоритети и тоа: зголемување на квалитетот на подзаконските акти и нивна ефикасна примена, унапредување на постапката и начинот за водење на Ибирачкиот список, подобрување на ефикасноста на активностите помеѓу избориоте органи, зголемување на свесноста и довербата на граѓаните во изборниот процес, унапредување на знаењето и вештините на изборната администрација за спроведување на избори, подобрување на внатрешната организација и функционирање на ДИК и итегрирање на родовите аспекти во активностите на ДИК. Врз основа на Стратешкиот план ДИК ќе изготви акциски планови, а првиот ќе биде за локалните избори што треба да се одржат во втората половина на октомври.
Стратешкиот план е изготвен во рамки на проект за изборни реформи поддржан од Швајцарија, а го спроведуваат ИФИМЕС и Младинскиот совет на Македонија.
Членовите на седницата усвоија и Упатство за спроведување на процедура за вршење на ex-ante контрола на примените фактури за платено политичко рекламирање од радиодифузери, печатените и електронски медиуми.