Наша конечна цел е да добиеме фер договор заснован на факти, кој ќе не стави на маса со сите прозападни земји и каде рамноправно, рамо до рамо, ќе го јакнеме нашиот идентитет, ќе ја јакнеме економијата и ќе отвораме перспективи. Веројатно мојот оптизмизам ќе се оствари. Но, конечно ќе биде, кога ќе биде конечно се. Се надевам дека тоа ќе биде утре, рече премиерот Зоран Заев во вечерашната дебата на „Топ тема“ во врска со прашањето за името и денешниот разговор со Ципрас.
Договорот за името, напомена премиерот, е историски, а на Македонија во овој контекст и треба лидерство.
Според Заев, денешниот разговор со Ципрас траел еден час, но утре тие треба повторно да се слушнат.
– Остана утре повторно да се слушнеме, со надеж дека е можно да го направиме исчекорот, информира премиерот, потенцирајќи уште еднаш дека е оптимист.
Негов став е дека Македонија треба да гради пријателството со грција, а во тој дух треба да биде и договорот. Ако покажеме европски манири на решавање проблеми, тогаш дефинитивно ќе ги минимизираме шансите за проблем во евро и НАТО интергациите.
Дебата е по повод една година од работењето на Владата, а премиерот Заев одговара на прашања што ги поставуваат претставници на бизнис и академската заедница, граѓански организации и студенти во врска со досега оствареното, но и потфрленото.
Премиерите на Македонија и на Грција Зоран Заев и Алексис Ципрас денеска телефонски разговарале еден час, потврдија од Владата.
Заев и Ципрас се слушнале меѓу 14 и 15 часот и разговарале околу еден час.
Детали од комуникацијата не се познати засега. Единствено се дознава дека разговорот поминал во позитивна атмосфера. Наводно, договорено е утре наутро двајцата премиери да се слушнат повторно за да ги продолжат разговорите.
Претходно денеска, премиерот Зоран Заев денеска изрази надеж дека многу брзо ќе биде постигнато решение за спорот за името меѓу Македонија и Грција и оти тоа би можело да се случи пред Самитот на ЕУ закажан за 28 и 29 јуни.
Потенцира дека е битно да се постигне квалитетно решение кое што ќе биде правно поткрепено, достоинствено и ќе го зачува идентитетот, поради тоа што понатаму тоа решение треба да има и позитивен одѕив кај граѓаните на земјава кои за него треба да на крај да се изјаснат на референдум.
За името кое што ќе биде постингато како можно решение не сакаше да шпекулира ниту сакаше да одговори на новинарско прашање дали Република Северна Македонија како најчесто споменувано во грчките медиуми е можната прифатлива опција.
Грчките медиуми пишуваат дека Заев в среда ќе се сретне со германската канцеларка Меркел за да ја информира за договорот за спорот за името. Заев денеска кажа дека на средбите со високи германски претставници нема да се разговара за тоа. Тој рече дека спорот се решава на ниво на билатерална комуникација меѓу Грција и Македонија, а дека поддршката што ја даваат ЕУ, САД и сите меѓународни чинители е мошне важна во целиот процес.