Министерството за труд и социјална политика утре ќе распише оглас за вработување на уште 50 лица во државната администрација, кои до 18 години имале статус на деца без родители и без родителска грижа.
Огласот е дел од Програмата Д-10 преку која на почетокот на годинава беа вработени 33 лица со таков статус. Ресорниот министер Диме Спасов денеска најави дека вработувањето на таа категорија граѓани ќе продолжи и во наредните години со цел што поголемо намалување на таа категорија невработени.
– Согласно Програмата Д-10 оваа година ќе бидат вработени вкупно 83 лица, со што значително ќе им се помогне и ќе им се обезбедат услови за нормален живот, постојана работа со цел нивна интеграција во општествениот живот, рече Спасов на прес-конференција.
Согласно Законот за државни службеници се планира вработување на 50 лица во Министерството за труд и социјална политика, со звања помлад соработник, виш референт, референт и помлад референт. Тие ќе имаат статус на државни службеници, а зависно од потребите на институциите ќе може да бидат распоредени во други министерства.
– Согласно планот што го имаме направено за наредните 4-5 години очекуваме речиси целосно намалување на бројот на невработени. Годинава ќе бидат вработени вкупно 83 лица, а за наредните години планот е од 20 до 40 лица, односно се очекува во наредните години да има број од 120 до 170 лица со ваков статус, појасни Спасов.
Јавниот оглас, покрај во дневниот печат, ќе биде објавен и на веб страницата на Министерството за труд и социјална политика www.mtsp.gov.mk, и на сајтот на Агенцијата за администрација.