Почнаа да се објавуваат имињата на првите жртви на пукањето во училиштето во градот Увалде во Тексас, во кое загинаа 19 деца и двајца возрасни. Осумгодишниот Узија Гарсија е идентификуван од неговото семејство како едно од децата убиени во нападот.
„Најслаткото мало момче што некогаш сум го познавал“, изјави дедото на Гарсија, Мани Ренфро, за Асошиетед прес. „Не го велам тоа само затоа што ми беше внук“.
Ренфро рече дека Узија последен пат го посетил во Сан Анџело за време на пролетниот распуст. „Си игравме со дофрлање топка, го учев на трикови за додавање. Тој беше брзо мало момче и многу успешно ја фаќаше топката. Да имаше шанса да порасне ќе го правеше тоа токму како што вежбавме“, изјави скршениот од болка Мани Ренфро.
Лиза Гарза (54) од Арлингтон, Тексас, исто така тагува за смртта на внук Ксавиер Хавиер Лопез. „Тој беше само вљубено 10-годишно момче, кое само уживаше во животот, не знаејќи дека оваа трагедија ќе се случи денес“, рече таа. „Беше многу слатко дете, сакаше да се задева со своите браќа, неговата мајка. Ова ни нанесе штета на сите нас“. Таа додаде и дека неговата мајка била со него во училиштето за време на церемонијата на доделување награди само неколку часа пред пукањето, не сфаќајќи дека тоа е последен пат како го гледа.
Амери Џо Гарза, исто така 10-годишна, семејството ја идентификуваше како едно од убиените деца. Нејзиниот татко, Ангел Гарза, изјави за ABC News дека девојчето штотуку наполнило 10 години на 10 мај. „Ви благодарам на сите за молитвите и помошта во обидот да го пронајдам моето бебе“, напиша Ангел Гарза за ABC во изјавата. „Таа е пронајдена. Мојата мала љубов сега лета високо со ангелите горе. Ве молиме, не земајте ни секунда здраво за готово. Прегрнете го вашето семејство. Кажете им дека ги сакате. Те сакам Амери Џо. Чувај го од горе твоето мало братче“, порача тој.
Медиумите во САД ја именуваа Ирма Гарсија како втора возрасна жртва на масовното пукање во основното училиште Роб во Увалде.
Нејзината биографија вели дека во училиштето предавала 23 години, а била мажена и има четири деца. На веб-страницата на училиштето таа вели „Толку сум возбудена што веќе ја започнувам оваа нова учебна година“ и споделува со нејзините ученици дека обожава да прави скара со нејзиниот сопруг, да слуша музика и да оди на крстарења низ земјата“.
Според Ен-Би-Си, полицијата на нејзиниот син му кажала дека Гарсија ги штитела до крај нејзините ученици. Гарсија беше колешка со наставничката за четврто одделение Ева Мирелес, за која претходно беше потврдено дека е една од возрасните убиени во нападот.
(Гардијан)