Владата на ВМРО-ДПМНЕ нема своја автентична политичка понуда. Затоа копира мерки од Програмата на СДСМ. Односно, откако прво набедуваше дека наводно биле нереални и неостварливи, потоа ВМРО ДПМНЕ почна да копира дел од мерките на СДСМ и да ги промовира како свои, рече денеска Ванчо Узунов, потпретседател на СДСМ.
– Наместо во интерес на граѓаните, да ги примени во целост, така како што ги дефинираше СДСМ, Владата во стилот на своето манипулативно владеење ги видоизмени мерките. Од ова однесување на власта штета имаат граѓаните.
-На пример, мерката на СДСМ за поврат на 15 проценти од ДДВ кон граѓаните, Владата ја искриви во лото. Така, наместо да добиваат сите што плаќаат данок, со измислицата на владата сега добиваат само неколкумина. А примената на мерката на СДСМ за поврат на дел од ДДВ кон граѓаните, само за декември, ќе значеше 10,5 милиони евра пари во рацете на граѓаните. Само во еден месец.
– Втор пример, мерката на СДСМ за враќање на персоналецот од плата на сите вработени кои имаат плата до 12.000 денари. После обидот за нејзино омаловажување, владата ја искористи како намалување на давачките само при новите вработувања. Така, наместо повторно да добиваат сите посиромашни граѓани – што е целта на СДСМ за враќање на средната класа – сега ќе добиваат само евентуалните работодавачи на млади луѓе.
– Трет пример, откако СДСМ предложи насочување на инвестициите кон изградба на патишта и друга инфраструктура, после осум години лошо владеење, владата „се сети“ дека не требало да се градат само споменици, па дури сега, пред избори најавува инвестиции.
– Четврт пример, откако СДСМ предложи мерки за вработување на млади лица преку субвенционирање на давачките од плати за нив, владата „се сети“ на истата мерка, ја ископира во целост, со тоа што зборот субвенционирање го замени со ослободување, истакна Узунов.
Тој посочи дека има и клучни мерки на СДСМ кои Владата на ВМРО-ДПМНЕ не сака да ги примени. На пример, мерката на СДСМ за реформирање на казнената политика, преку намалување на прекршочните казни за 50 проценти. Тоа не се вклопува во концептот на владеење на ВМРО-ДПМНЕ. Зошто? Па од каде тогаш оваа влада ќе го полни буџетот? Затоа, таа мерка не ја копираа и нема никаква намера да ја примени ниту видоизменета.
Истото се однесува и на мерките на СДСМ за праведно оданочување (помал персонален данок од доход за посиромашните граѓани), укинување на екстерното тестирање на учениците, враќање на демократијата, владеењето на правото и воведувањето на вистинска а не фингирана отчетност и одговорност на власта, како и редица други мерки, рече потпретседателот на СДСМ.