Потпретседателот на СДСМ Ванчо Узунов за ескалацијата на трговските мерки меѓу Македонија и Косово изјави дека не станува збор само за трговска војна.
– Мислам дека има малку и политика со оглед дека нашата влада воведе такси за граѓани, што е надвор од трговијата. Факт е дека секогаш кога ќе се измешаат политиката и бизнисот, особено на овој начин, страда бизнисот, за жал неправедно на штета на граѓаните.
На прашањето колкави ќе бидат штетите за државата Узунов оцени дека конкретни бројки во овој момент не е можно да се изнесат, но нагласи дека тие сигурно нема да бидат мали бидејќи Косово е се позначаен трговски партнер, а со кого имаме суфицит.
Тој оцени дека не требаше да се дозволи да дојде до ова. Суштината е државата со своите чекори да не дозволи да се случи. Сега не останува друго освен да се фокусира на отстранување на пречките кои довеле до ова.
Во согласност со релевантните служби во Приштина, Македонија на Косово извезува стока во вредност од 300 милиони евра, додека извозот на Косово во Македонија, изнесува само 17 милиони евра.
Приштинските медиуми го објавија написот на скопскиот весникот “Дневник” дека македонската влада сериозно размислува за воведување на визите за граѓаните на Косово.
И премиерите на земјата, Хашим Тачи и Никола Груевски синоќа, како што е соопштено од страна на приштинските медиуми, телефонски разговарале за решавање на овие проблеми, но не постигнаа договор.